साइकल दुर्घटनामा महोत्तरीमा एक बालकको मृत्यु

महोत्तरी, साउन २० गते । आफैंले चलाएको साइकल दुर्घटना हुँदा महोत्तरीको सदरमुकाम जलेश्वरमा एक बालकको मृत्यु भएको छ ।

जलेश्वर नगरपालिका वडा नं ७ बस्ने सुरेन्द्र मण्डलका १० वर्षीय छोरा अभिषेककुमार मण्डलको शनिबार बिहान घरको वरिपरि साइकल चलाइरहेका बेला अचानक दुर्घटना हुँदा मृत्यु भएको हो । उक्त दुर्घटनामा साइकलको ब्रेकको फलामे छड निजको आँखामा पसेर मस्तिष्कसम्म पुगेको थियो ।

घटनापछि तत्काल बालक मण्डललाई उपचारका लागि अञ्चल अस्पताल जनकपुरमा लगिएकोमा त्यहाँ उपचार सम्भव नभएपछि धरान लगिएको र उपचारकै क्रममा गएराति निजको मृत्यु भएको निजका काका वीरेन्द्र मण्डलले बताउनुभयो ।